കോതമംഗലം : 2025 ലെ റിപ്പബ്ലിക് ദിന പരേഡ് വനിതാ ബാന്റിൽ ഇടം നേടി കോതമംഗലം മാർ അത്തനേഷ്യസ് കോളേജ് എൻ സി സി കേഡറ്റുകൾ.റിപ്പബ്ലിക് ദിന പരേഡ് സെലെക്ഷന് പാലിക്കേണ്ട കർശനമായ മാനദണ്ഡങ്ങളും ദേശീയ തലത്തിലുള്ള ഗുണനിലവാര പരിശോധനയും വിജയിച്ചാണ് എം. എ. കോളേജ് വിദ്യാർത്ഥികൾ ബാന്റ് ടീമിലേക്ക് തെരഞ്ഞെടുക്കപ്പെട്ടത്.ചരിത്ര വിദ്യാർത്ഥിനിയായ അനീറ്റമോൾ എൽദോസ് , സോഷ്യോളജി വിദ്യാർത്ഥിനികളായ എൽന എബി, വൈഷ്ണമി ഷൈജൻ, ബി. കോം വിദ്യാർത്ഥിനിയായ സന്ധ്യ രാജേഷ് എന്നിവരാണ് ഡിസംബർ അവസാന വാരം ആരംഭിക്കുന്ന ക്യാമ്പിലേക്ക് ഇടം നേടിയത്.
രാജ്യത്തിന്റെ വിവിധ ഭാഗങ്ങളിൽ നിന്നുള്ള എൻ സി സി യുടെ നാല് മ്യൂസിക്കൽ ബാന്റുകളാണ് ഈ വർഷം റിപ്പബ്ലിക് ദിന പരേഡിൽ പങ്കെടുക്കാൻ യോഗ്യത നേടിയത്.
ഇന്ത്യൻ എൻ സി സി യുടെ ചരിത്രത്തിലെ തന്നെ അപൂർവ നേട്ടമാണ് ഒരു വനിതാ ടീം ബാൻഡ് രാജ്യത്തിന്റെ റിപ്പബ്ലിക് ദിന പരേഡിലേക്ക് തെരഞ്ഞെടുക്കപ്പെടുന്നത്. കേരള ലക്ഷദ്വീപ് ഡയറക്ടറേറ്റ് ൻ്റെ ആദ്യത്തെ വനിത ബാന്റ് സംഘമാണ് ഡൽഹിയിലേക്ക് തെരഞ്ഞെടുക്കപ്പെട്ടിരിക്കുന്നത്.എൻ സി സി കേഡറ്റുകളുടെ ഈ നേട്ടത്തിൽ ഏറെ സന്തോഷമുണ്ടെന്നും,ഈ ചരിത്ര നേട്ടം അഭിമാനകരമാണെന്നും കോളേജ് അസോസിയേഷൻ സെക്രട്ടറി ഡോ. വിന്നി വറുഗീസ്, പ്രിൻസിപ്പൽ ഡോ. മഞ്ജു കുര്യൻ, എൻ സി സി ഓഫീസർ ഡോ. രമ്യ. കെ എന്നിവർ പറഞ്ഞു
