കോതമംഗലം :എം എ എഞ്ചിനീയറിങ്ങ് കോളേജിന് അഭിമാനമായി പുതിയ വി എസ് എസ് സി ഡയറക്ടർ.വിക്രം സാരാഭായ് സ്പേസ് സെന്ററിന്റെ (വി എസ് എസ് സി) പുതിയ ഡയറക്ടറായി ഡോ. എസ് ഉണ്ണികൃഷ്ണൻ നായർ ചുമതലയേറ്റെടുത്തപ്പോൾ അത് കോതമംഗലം മാർ അത്തനേഷ്യസ് എഞ്ചിനീയറിങ്ങ് കോളേജിന് അഭിമാന നിമിഷമായി. എയർ ഇന്ത്യ ചെയർമാൻ ആയിരുന്ന റോയി പോൾ ഐ.എ.എസ് . അടക്കം ഒട്ടേറെ പ്രതിഭകളെ സംഭാവന ചെയ്ത മാർ അത്തനേഷ്യസ് എഞ്ചിനീയറിങ്ങ് കോളേജിന്റെ മികവിന്റെ മുദ്രയായി ഇപ്പോൾ വി എസ് എസ് സി യുടെ പുതിയ ഡയറക്ടർ നിയമനവും. 1980-85 കാലഘട്ടത്തിൽ കോളേജിലെ മെക്കാനിക്കൽ എഞ്ചിനീയറിങ്ങ് വിദ്യാർത്ഥിയായിരുന്ന ഉണ്ണികൃഷ്ണൻ നായർ വി എസ് എസ് സി ഡയറക്ടറായ ആഹ്ളാദത്തിലാണ് വിദ്യാർത്ഥികളും ആദ്ധ്യാപകരും മാനേജ്മെന്റും.
പുതിയ വി എസ് എസ് സി ഡയറക്ടറെ കോളേജ് അസോസിയേഷൻ സെക്രട്ടറി ഡോ . വിന്നി വർഗീസ്, പ്രിൻസിപ്പാൾ ഡോ. മാത്യു കെ, മെക്കാനിക്കൽ എഞ്ചിനീയറിങ്ങ് വിഭാഗം മേധാവി ഡോ. ബിനു മർക്കോസ് എന്നിവർ ഫോണിൽ വിളിച്ച് അഭിനന്ദനം അറിയിച്ചു. അടുത്ത ആഴ്ച്ചയോടെ കോളേജിൽ എത്തുമെന്നും അദ്ദേഹം അറിയിച്ചു.
ഗഗൻയാൻ പദ്ധതി രൂപരേഖ തയ്യാറാക്കുന്നത് മുതൽ നിർണ്ണായക പങ്ക് വഹിച്ച ഉണ്ണികൃഷ്ണൻ നായർ വി എസ് എസ് സി ഡെപ്യൂട്ടി ഡയറക്ടർ , അഡ്വാൻസ് സ്പേസ് ട്രാൻസ്പോർട്ടേഷൻ സിസ്റ്റം പ്രോഗ്രാം ഡയറക്ടർ തുടങ്ങിയ ചുമതലകളും വഹിച്ചിട്ടുണ്ട്. അന്താരാഷ്ട്ര അസ്ട്രോണമിക്കൽ അസ്സോസിയേഷൻ പഠന ഗ്രൂപ്പുകളുടെ തലവൻ ആയിരുന്നു. മനുഷ്യ ബഹിരാകാശ പര്യവേക്ഷണത്തിനായുള്ള ഇന്ത്യ-റഷ്യ ബഹിരാകാശ സഹകരണ പദ്ധതി നയിച്ചു. മനുഷ്യനെ ബഹിരാകാശത്ത് അയക്കുന്ന പദ്ധതിക്കായി രൂപീകരിച്ച ബാംഗ്ലൂരു ഹ്യൂമൻ ഫ്ളൈറ്റ് സെന്റർ ഡയറക്ടർ ചുമതലയിലും തുടരുന്നു. മാർ അത്തനേഷ്യസ് എഞ്ചിനീയറിങ്ങ് കോളേജിൽ വിദ്യാർത്ഥികളും അദ്ധ്യാപകരും ആയി സംവദിക്കുന്നതിനും സെമിനാറുകളിൽ സംസാരിക്കുന്നതിനുമായി മുൻപ് പലവട്ടം കോളേജിൽ എത്തിയിട്ടുണ്ട്. 1985 ലാണ് അദ്ദേഹം വി എസ് എസ് സി യിൽ ജോലിയിൽ പ്രവേശിച്ചത്.
