കോതമംഗലം: നേര്യമംഗലം വനമേഖല അപൂർവ്വമായൊരു പൂക്കാലത്തിന് സാക്ഷ്യം വഹിക്കുകയാണ്; തൃണവർഗത്തിലെ ഏറ്റവും വലിയ സസ്യമായ മുളയാണ് കാട്ടിലാകെ പൂത്തുലഞ്ഞു നിൽക്കുന്നത്.
നേര്യമംഗലം വന മേഖലയിൽ മുളകൾ കൂട്ടമായി പൂത്തുതുടങ്ങിയിരിക്കുകയാണ്. നഗരംപാറ, വാളറ വനഭാഗങ്ങളിലാണ് പൂക്കൾ ദൃശ്യമായിരിക്കുന്നത്. അര നൂറ്റാണ്ടിനിടയിൽ സംഭവിക്കുന്ന ഈ പ്രതിഭാസത്തോടെ മുളകൾ ഉണങ്ങി നശിക്കുകയാണ് ചെയ്യുന്നത്.
ഇതു മൂലം ഈ മേഖലയിൽ മുള കളുടെ ലഭ്യത തീർത്തും കുറഞ്ഞേക്കാം. സസ്യഭുക്കുകളായ ആന, കാട്ടുപോത്ത് തുടങ്ങിയ മൃഗങ്ങൾക്ക് ഭക്ഷ്യ ദൗർലഭ്യം നേരിടേണ്ടിയും വന്നേക്കാം. മുള പൂത്തുഉണങ്ങുമ്പോൾ വേനലിൽ കനത്ത കാട്ടു‌തീക്കും കാരണമാകാം.
മുളയരി പോഷക സമൃദ്ധമായ ഒരു വന വിഭവമാണ്. മുളയരി കിലോയിക്ക് 400മുതൽ 600രൂപ വരെ വിലയുണ്ട്. ആദിവാസികൾ ഇത് വൻ തോതിൽ ശേഖരിച്ച് ഉപയോഗിക്കാറുണ്ട്.
മുളയരി ധാരാളമായി ഉണ്ടാകുന്നത്തോടുകൂടി വന മേഖലയിൽ കീടങ്ങളും പെരുച്ചാഴികളും പെരുകുകയും പക്ഷി സാന്നിധ്യം വർധിക്കുകയും ചെയ്യും. അങ്ങനെ മുളയുടെ പൂക്കാലം വനത്തെ സംബന്ധിച്ച് വളരെ പ്രത്യേകതകൾ നിറഞ്ഞ സംഭവമാണെന്ന് നഗരംപാറ ഡെപ്യൂട്ടി റേഞ്ച് ഓഫീസർ G G സന്തോഷ് പറഞ്ഞു.
