കവളങ്ങാട്: നേര്യമംഗലം കൃഷിഫാമിൽ നെടുനേന്ത്രൻ ടിഷ്യൂ കൾച്ചർ വാഴ വിതരണത്തിനൊരുങ്ങി. 25000 വാഴ തൈകളാണ് തയ്യാറാക്കിയിരിക്കുന്നത്. ഒരു കോടി ഫലവൃക്ഷത്തൈ വിതരണത്തിന്റെ ഭാഗമായാണ് ടിഷ്യു കൾച്ചർ ഇനം വാഴയും പരീക്ഷിക്കുന്നത്. വലിയ കുലകൾ ലഭിക്കുമെന്നതും പിന്നീടുണ്ടാകുന്ന വാഴ കന്നുകൾക്ക് ഇതേ ഗുണനിലവാരമുണ്ടാകുമെന്നതും ഇതിന്റെ പ്രത്യേകതയാണ്.

കാർഷിക സർവകലാശാല വൈറ്റില ഗവേഷണ കേന്ദ്രത്തിൽ നിന്നും ടിഷ്യൂ കൾച്ചർ ബോട്ടിലിൽ എക്‌സ് അഗർ പ്ലാന്റ്‌സ് കൊണ്ടുവന്നശേഷം ഇതിൽ നിന്നും വിത്തുകൾ അടർത്തിയെടുത്ത് അണുവിമുക്തമാക്കിയ മണലിൽ പോളിത്തീൻ കവറിലാണ്് ഇവകൾ പാകുന്നത്. മൂന്നാഴ്ച വളർച്ചയെത്തിയ ശേഷമാണ് വിതരണത്തിനെടുക്കുക. ഫാമിലെ കൗണ്ടർ വഴിയും ജില്ലയിലെ എല്ലാ കൃഷിഫാമുകൾ വഴിയും വിതരണം ചെയ്യും. വളർച്ചയെത്തിയ തൈകൾ വിതരണം ആരംഭിച്ചതായും നേര്യമംഗലം ഫാമിൽ രണ്ടുവർഷത്തിനുള്ളിൽ ടിഷ്യു കൾച്ചർ ലാബ് പ്രവർത്തനമാരംഭിക്കുമെന്ന് പ്രതീക്ഷിക്കുന്നതായി ഫാം സൂപ്രണ്ട് സൂസൻ ലീ തോമസ് പറഞ്ഞു.

Caption : നേര്യമംഗലം ഫാമില്‍ ടിഷ്യു കള്‍ച്ചര്‍ വാഴ വിതരണത്തിനൊരുക്കുന്നു

കോതമംഗലം: സെപ്റ്റംബർ 4 മുതൽ 7വരെ കൃഷി വകുപ്പിൻ്റെ ഓണവിപണികൾ പ്രവർത്തനം ആരംഭിക്കുന്നു. കോതമംഗലത്ത് 12 ഓണവിപണികളാണുള്ളത്. മുനിസിപ്പൽ കൃഷിഭവൻ പരിധിയിൽ രണ്ടു വിപണികളും, മറ്റു പഞ്ചായത്തുകളിൽ ഓരോന്നു വീതവും വിപണികൾ പ്രവർത്തിക്കും.

കർഷകരുടെ ഉൽപ്പന്നങ്ങൾ കൂടാതെ വട്ടവടയിൽ നിന്നും, ഹോർട്ടികോർപ്പു മുഖേന സംഭരിച്ചതുമായ പച്ചക്കറികൾ വിപണികളിലുണ്ടാവും. കർഷകർക്ക് വിപണി വിലയെക്കാർ പത്തു ശതമാനം വില അധികം നൽകിയാണ് സംഭരിക്കുക. പൊതുവിപണിയെക്കാൾ മുപ്പതു ശതമാനം വില കുറച്ച് കൃഷിവകുപ്പ് മാർക്കറ്റിൽ നിന്ന് ഉപഭോക്താക്കൾക്ക് ലഭിക്കുന്നു. പൈങ്ങോട്ടൂരിൽ നിന്നു മാത്രമായി മൂന്നു ടൺ ഉൽപ്പന്നങ്ങളാണ് വിവിധ ഓണച്ചന്തകളിലേക്ക് നൽകുന്നത്. വട്ടവടയിൽ നിന്ന് കാബേജ്, കാരറ്റ്, ഉരുളക്കിഴങ്ങ്, ബീറ്റ്റൂട്ട്, എന്നിവ കൃഷി ഉദ്യോഗസ്ഥരുടെ നേതൃത്വത്തിൽ ശനിയാഴ്ച വെളുപ്പിനു തന്നെ എത്തിച്ചിട്ടുണ്ട്.

പൈങ്ങോട്ടൂരിലെ കർഷകരുടെ ഉൽപ്പന്നങ്ങളായ പാവൽ, പടവലം, മത്തൻ, വെള്ളരി, സാലഡ് വെള്ളരി, ചുരയ്ക്ക എന്നിവയും തയ്യാറായിട്ടുണ്ട്. കനത്ത മഴക്കെടുതിയിൽ ഒട്ടേറെ കർഷകരുടെ പച്ചക്കറികൾ നഷ്ടമായെങ്കിലും ബാക്കിയുള്ള ഉൽപ്പന്നങ്ങൾ കൃത്യമായി സംഭരിക്കാനുള്ള നടപടികൾ അതാതു കൃഷിഭവൻ ഉദ്യോഗസ്ഥർ നടത്തിയിട്ടുണ്ട്. എല്ലാ വിപണികളിലേക്കു മുള്ള പച്ചക്കറികൾ ശനിയാഴ്ച ഉച്ചതിരിഞ്ഞ് കൃഷി ഉദ്യോഗസ്ഥർ ഏറ്റെടുക്കും. 12 വിപണികളും ഞായറാഴ്‌ച 11 മണി മുതൽ പ്രവർത്തനമാരംഭിക്കുമെന്ന് കൃഷി അസിസ്റ്റൻ്റ് ഡയറക്ടർ അറിയിച്ചു.

കോതമംഗലം : രണ്ടു ദിവസമായി തുടരുന്ന ശക്തമായ മഴയും, വെള്ളപ്പൊക്കവും മൂലം കോതമംഗലത്തെ കാർഷിക മേഖലയിൽ കനത്ത നാശനഷ്ടം. കോതമംഗലം മുനിസിപ്പാലിറ്റി, കവളങ്ങാട്, പിണ്ടിമന, കുട്ടമ്പുഴ,പല്ലാരിമംഗലം, പൈങ്ങോട്ടൂർ തുടങ്ങിയ പഞ്ചായത്തുകളിലാണ് ഓണത്തിനായി കൃഷി ചെയ്ത വിളകൾക്ക് കനത്ത നാശനഷ്ടമുണ്ടായത്. ബ്ലോക്കുതലത്തിൽ 121 കർഷകർക്കായി 88.28 ലക്ഷം രൂപയുടെ നാശനഷ്ടമാണ് പ്രാഥമികമായി വിലയിരുത്തുന്നത്. ആകെ 9590 കുലച്ച നേന്ത്ര വാഴകളും 13,120 കുലയ്ക്കാത്ത നേന്ത്ര വാഴകളും 155 റബ്ബർ മരങ്ങളും, കൂടാതെ മറ്റു കാർഷിക വിളകൾക്കും കനത്ത നാശനഷ്ടം സംഭവിച്ചിട്ടുണ്ട്.
നാശനഷ്ടമുണ്ടായ സ്ഥലങ്ങളിൽ കൃഷി ഉദ്യോഗസ്ഥർ സന്ദർശിച്ച് പ്രാഥമിക നഷ്ടം വിലയിരുത്തി.
കോതമംഗലം മുനിസിപ്പാലിറ്റിയിൽ 35 കർഷകരുടെ 1500 കുലച്ച വാഴകളും 5500 കുലക്കാത്ത വാഴകളും, 20 ഹെക്ടറിലെ കപ്പക്കൃഷിയും നശിച്ചതു മൂലം 41.45 ലക്ഷത്തോളം രൂപയുടെ നാശനഷ്ടമുണ്ടായി.

കവളങ്ങാട് 30 കർഷകരുടെ 1840 കുലച്ച വാഴകളും 2600 കുലക്കാത്ത വാഴകളും, 155 റബ്ബറും നശിച്ചതു മൂലം 24.2ലക്ഷം രൂപയുടെ നാശനഷ്ടവും, പല്ലാരിമംഗലം പരിധിയിൽ 25 കർഷകരുടെ 5000 കുലച്ച വാഴകളും 4000 കുലയ്ക്കാത്ത വാഴകളും, 3 ഹെക്ടർ കപ്പയും നശിച്ചതു മൂലം 46.4 ലക്ഷം രൂപയുടെ നഷ്ടവും, കുട്ടമ്പുഴയിൽ 7 കർഷകരുടെ 200 കുലച്ച വാഴകളും 70 കുലക്കാത്ത വാഴകളും,17 കൊക്കോ, 25 കവുങ്ങ് എന്നിവ നശിച്ചതു മൂലം 1.59 ലക്ഷം രൂപയുടെ നാശനഷ്ടവും,
പിണ്ടിമനയിൽ 20 കർഷകരുടെ 750 കുലച്ച വാഴകളും 750 കുലക്കാത്ത വാഴകളും 2 ഹെക്ടർ പച്ചക്കറി, ഒരു ഹെക്ടർ കപ്പ എന്നിവ നശിച്ചതിൽ 8.23 ലക്ഷം രൂപയുടെ നാശനഷ്ടവും,
പൈങ്ങോട്ടൂരിൽ 4 കർഷകരുടെ 300 കുലച്ച വാഴകളും, 200 കുലക്കാത്ത വാഴകളും, 2 ഹെക്ടർ പച്ചക്കറിയും നശിച്ചതു മൂലം 3.41 ലക്ഷം രൂപയുടെ നാശനഷ്ടവും പ്രാഥമികമായി വിലയിരുത്തുന്നു. കൃഷി നാശം ഉണ്ടായ കർഷകർ പ്രകൃതിക്ഷോഭം, വിള ഇൻഷുറൻസ് ആനുകൂല്യങ്ങൾക്കായി അതാത് കൃഷി ഭവനുമായി എത്രയും പെട്ടെന്ന് ബന്ധപ്പെടേണ്ടതാണെന്ന് കോതമംഗലം കൃഷി അസിസ്റ്റൻറ് ഡയറക്ടർ അറിയിച്ചു.

ചിത്രം :കടവൂരിൽ പി.ജെ ജേക്കബ്, പുല്ലോലിക്കൽ ന്റെ വാഴ കൃഷിയിൽ വെള്ളം കയറിയത്