നേര്യമംഗലം : കനത്ത മഴയെത്തുടർന്ന് കൊച്ചി ധനുഷ്കോടി ദേശിയ പാതയുടെ ഭാഗമായ നേര്യമംഗലം – ഇരുമ്പുപാലം റോഡിലൂടെ മലവെള്ളം ആർത്തലച്ചു ഒഴുകിയത് യാത്രക്കാരെ ആശങ്കയിലാഴ്ത്തി. ഇന്ന് ഞായറാഴ്ച്ച വൈകിട്ട് കനത്ത മഴയാണ് ഈ ഭാഗത്തുമുണ്ടായത്. അടിമാലി മൂന്നാർ പോകുന്നവരും തിരിച്ചു വരുന്ന യാത്രക്കാരും മലവെള്ള പാച്ചലിൽ അകപ്പെടുകയും ചെയ്തു.
നേര്യമംഗലം നീണ്ടപാറ മേഖലയിലും കനത്ത മഴയാണുണ്ടായത്. ശക്തമായ മഴയെത്തുടർന്ന് മലവെള്ളം കുത്തിയൊലിച്ചു വന്നത് മൂലം നേര്യമംഗലം – ഇടുക്കി പ്രധാന റോഡിലെ നീണ്ടപാറ വായനശാലപ്പടിക്ക് സമീപം റോഡ് ഭാഗികമായി കുത്തിയൊലിച്ചു പോകുകയും ചെയ്തു.
ഇന്ന് വൈകിട്ട് പെയ്ത കനത്ത മഴയിൽ കുട്ടമ്പുഴ-പിണവൂർകുടി റോഡിലെ ചപ്പാത്തുകൾ മുങ്ങി ഗതാഗതതടസ്സം നേരിട്ടു. നിരവധി വിനോദ സഞ്ചാരികളും നാട്ടുകാരും മറുകര കടക്കാനാകതെ റോഡിൽ കുടുങ്ങി. ഈ മേഖലയിൽ ശക്തമായ മഴയാണ് ഉണ്ടായത്. പിണവൂർകുടിക്ക് പോകേണ്ടവരും മാമലക്കണ്ടം വഴി കോതമംഗലം ഭാഗത്തേക്ക് പോകേണ്ടവരും ചപ്പാത്തുകൾ വെള്ളത്തിൽ മുങ്ങിയത് മൂലം വഴിയിൽ കുടുങ്ങി.
