ചേലാട് അന്താരാഷ്ട്ര സ്റ്റേഡിയം; പുതിയ ടെണ്ടർ ക്ഷണിക്കാൻ കിറ്റ്കോയ്ക്ക് നിർദ്ദേശം നൽകിയതായി കായിക വകുപ്പ് മന്ത്രി വി അബ്ദുറഹിമാൻ നിയമസഭയിൽ 

കോതമംഗലം : ചേലാട് അന്താരാഷ്ട്ര സ്റ്റേഡിയം നിർമ്മാണത്തിന്റെ
പുതിയ ടെണ്ടർ ക്ഷണിക്കാൻ കിറ്റ്കോയ്ക്ക് നിർദ്ദേശം നൽകിയതായി കായിക വകുപ്പ് മന്ത്രി വി അബ്ദുറഹിമാൻ നിയമസഭയിൽ അറിയിച്ചു. ആന്റണി ജോൺ എംഎൽഎയുടെ ചോദ്യത്തിനു മറുപടി ആയിട്ടാണ് മന്ത്രി ഇക്കാര്യം സഭയിൽ വ്യക്തമാക്കിയത്. കോതമംഗലം ചേലാട് അന്താരാഷ്ട്ര സ്റ്റേഡിയം നിർമ്മാണവുമായി ബന്ധപ്പെട്ട സാങ്കേതിക തടസ്സങ്ങൾ നീക്കുന്നതിനെ സംബന്ധിച്ചും, സ്പെഷ്യൽ പർപ്പസ് വെഹിക്കിൾ ആയി നിശ്ചയിച്ചിട്ടുള്ള കേരള ഇൻഡസ്ട്രിയൽ ആൻഡ് ടെക്നിക്കൽ കൺസൾട്ടൻസി ഓർഗനൈസേഷന്റെ ഭാഗത്തുനിന്നുണ്ടായ ഗുരുതര വീഴ്ചകളെ സംബന്ധിച്ചും, സ്റ്റേഡിയത്തിന്റെ നിർമ്മാണ പ്രവർത്തികൾ വേഗത്തിൽ ആരംഭിക്കണമെന്നും ആവശ്യപ്പെട്ടുകൊണ്ടുള്ള ആന്റണി ജോൺ എം എൽ എ യുടെ ചോദ്യത്തിന് മറുപടി ആയിട്ടാണ് മന്ത്രി ഇക്കാര്യം വ്യക്തമാക്കിയത്.16.03.2018 ലെ സര്‍ക്കാര്‍ ഉത്തരവ്‌ (സാധാനം.)

38/2018/കാ.യു.വ പ്രകാരം കിഫ്ബി സഹായത്തോടെ കോതമംഗലം ചേലാട്‌ അന്താരാഷ്ട്ര സ്റ്റേഡിയം നിര്‍മ്മിക്കുന്നതിനായി ഭരണാനുമതി നല്‍കിയിരുന്നു. പ്രസ്തുത പദ്ധതിയുടെ നിര്‍മ്മാണത്തിന്റെ സ്പെഷ്യൽ പര്‍പ്പസ്‌ വെഹിക്കിള്‍ (എസ്. പി.വി )ആയി M/s. കിറ്റ്‌കോയെ ആണ്‌ ചുമതലപ്പെടുത്തിയി ട്ടുള്ളത്‌. ടി പദ്ധതിയില്‍ പ്രധാനമായും നാച്ചുറല്‍ ഫുട്‌ബോള്‍ ടര്‍ഫ്‌,8 ലെയിന്‍ 400 മീറ്റർ സിന്തറ്റിക്‌ ട്രാക്ക്‌, പവിലിയന്‍ ബില്‍ഡിംഗ്‌, ചെയ്ഞ്ചിങ് റൂം എന്നീ ഘടകങ്ങളാണ്‌ ഉള്‍പ്പെടുത്തിയിട്ടുള്ളത്‌. പദ്ധതിയുടെ ആരംഭത്തില്‍ 15.83 കോടി രൂപയുടെ സാമ്പത്തികാനുമതിയും, 15.74 കോടി രൂപയുടെ സാങ്കേതികാനുമതിയും ലഭിച്ചിട്ടുണ്ട്.ടി പദ്ധതി 03.11.2022-ന്‌ കിറ്റ്‌കോ ടെണ്ടര്‍ ചെയ്തെങ്കിലും , ബിഡുകള്‍ ലഭിക്കാത്തതിനാല്‍ നിരവധി തവണ റീ -ടെണ്ടര്‍ ചെയ്യേണ്ടിവന്നതിനുശേഷമാണ്‌ അംഗീകൃത ബിഡുകള്‍ ലഭിച്ചത്‌. കൂടാതെ പഞ്ചായത്ത്‌ മുഖേന നടത്തേണ്ട അതിര്‍ത്തി നിര്‍ണയ നടപടികള്‍ വൈകിയതും പദ്ധതി ആരംഭിക്കുവാന്‍ തടസ്സമുണ്ടാക്കി. പിന്നീട്‌ 20.01.2024-ന്‌ ടെണ്ടര്‍ അക്സപ്റ്റൻസ് കമ്മറ്റിയില്‍ (TAC ) ടെണ്ടര്‍ ഡോക്യൂമെന്റ്‌സ്‌ അവതരിപ്പിച്ചു . എല്ലാ ബിഡറുമാരുടെയും ഒറിജിനല്‍ ഡോക്യുമെന്റ്‌ സമര്‍പ്പിക്കുവാന്‍ കമ്മിറ്റി നിര്‍ദേശിച്ചതിന്റെ അടിസ്ഥാനത്തില്‍ ഒറിജിനല്‍ ഡോക്യുമെന്റ്‌ സമര്‍പ്പിക്കുവാന്‍ കിറ്റ്‌ക്കോ ബിഡര്‍ക്ക്‌ കത്ത്‌ നല്‍കിയെങ്കിലും മറുപടി ലഭിച്ചില്ല. കൂടാതെ ബിഡ്‌ വാലിഡിറ്റി പിരീഡ്‌ അവസാനിക്കുകയും ചെയ്തു. ആയതിനാൻ ടി ടെണ്ടര്‍ റദ്ദ്‌ ചെയ്ത്‌ പുതിയ ടെണ്ടര്‍ ക്ഷണിക്കുന്നതിന്‌ അനുമതി നല്‍കണമെന്ന്‌ അപേക്ഷച്ചതിന്‍ പ്രകാരം ആയതിന്‌ അനുമതി നല്‍കിയിട്ടുണ്ട്‌. തുടര്‍ന്ന്‌ പുതിയ ടെണ്ടര്‍ ക്ഷണിച്ച്‌ പ്രസ്തുത പദ്ധതി എത്രയും വേഗം നടപ്പിലാക്കാന്‍ എസ്‌.പി.വി ആയ കിറ്റ്കോയ്ക്ക്‌ നിര്‍ദ്ദേശം നല്‍കിയിട്ടുള്ളതായി മന്ത്രി വി അബ്ദുറഹിമാൻ നിയമസഭയിൽ അറിയിച്ചു.