കോതമംഗലം : പിണ്ടിമന പഞ്ചായത്ത് പത്താം വാർഡ് പുലിമല ചർച്ച് ജംഗ്ഷനിൽ പച്ചത്തുരുത്ത് പദ്ധതിക്ക് തുടക്കമായി.ആന്റണി ജോൺ എം എൽ എ അലങ്കാര ഇല്ലി തൈ നട്ട് ഉദ്ഘാടനം നിർവ്വഹിച്ചു.ഗ്രാമപഞ്ചായത്ത് പ്രസിഡന്റ് ജെസി സാജു അധ്യക്ഷയായി.ബ്ലോക്ക് പഞ്ചായത്ത് മെമ്പർമാരായ ലിസി ജോസഫ്, അനു വിജയനാഥ്,പുലിമല സെന്റ് തോമസ് ചർച്ച് വികാരി റവ:ഫാ : അഗസ്റ്റിൻ വട്ടേക്കാട്ട്,വാർഡ് മെമ്പർ എസ് എം അലിയാർ,ഗ്രാമപഞ്ചായത്തംഗം ലാലി ജോയി,എം എ അൻഷാദ്,അശ്വതി ടീച്ചർ,ജയ്സൺ ഇല്ലിപ്പറമ്പിൽ,എസ് കെ ഇബ്രാഹിം,ടി എസ് സജീഷ്,സജി കീളാച്ചിറങ്ങര,എൽദോസ് കീളാച്ചിറങ്ങര,ജോഷി ഐക്കരക്കുടി,അസ്മ പരീത് എന്നിവർ നേതൃത്വം നൽകി.തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ പൊതു സ്വകാര്യ സ്ഥലങ്ങളിൽ ചെറു വനങ്ങൾ സൃഷ്ടിച്ച്,കാലാവസ്ഥ വ്യതിയാനം,ആഗോളതാപനം,അന്തരീക്ഷ ഊഷ്മാവിന്റെ ക്രമാതീതമായ വർദ്ധന എന്നിവയ്ക്ക് മറുപടിയാണ് പച്ചത്തുരുത്ത്.ഭൂമിയെ ഹരിതാഭമാക്കുകയെന്ന ലക്ഷ്യത്തോടൊപ്പംഅന്തരീക്ഷത്തിൽ ഓക്സിജന്റെ അളവ് വർദ്ധിപ്പിക്കുക എന്നതും പദ്ധതി കൊണ്ട് ഉദ്ദേശിക്കുന്നു.ഹരിത കേരളം മിഷനും തദ്ദേശ സ്വയംഭരണ സ്ഥാപനവും കൃഷിവകുപ്പും,വനം വകുപ്പും,ദേശീയ ഗ്രാമീണ തൊഴിലുറപ്പു പദ്ധതി എന്നിവ സംയുക്തമായി നടപ്പാക്കുന്ന പദ്ധതിയാണ് പച്ചത്തുരുത്ത്.പത്താം വാർഡിൽ ഭൂതത്താൻകെട്ടിന്റെ അനുബന്ധ ടൂറിസം കേന്ദ്രമായ അടിയോടിയിൽ ഓക്സിജൻ ആന്റ് ബയോഡൈവേഴ്സിറ്റി പാർക്ക് ജില്ലാ പഞ്ചായത്ത് ഉപയോഗിച്ച് ഒന്നാം ഘട്ടം നിർമ്മാണം തുടങ്ങി.വാർഡിലെ അവശേഷിക്കുന്ന പൊതു സ്ഥലങ്ങളിലും സ്വകാര്യ വ്യക്തികളുടെ തരിശു സ്ഥലങ്ങളിലും പച്ചത്തുരുത്തുകൾ സൃഷ്ടിക്കുന്നതിനുള്ള ജന പങ്കാളിത്തത്തോടെയുള്ള പ്രവർത്തന പദ്ധതി തയ്യാറാക്കി.മാതൃക ജൈവ വൈവിധ്യ വാർഡ് എന്ന ലക്ഷ്യമാണ് മുന്നിലുള്ളതെന്ന് മെമ്പർ എസ് എം അലിയാർ മാഷ് പറഞ്ഞു.
