കോതമംഗലം : കാല്പന്തുകളിയിൽ രാജ്യത്തെ മികച്ച സർവ്വകലാശാല ടീമിനെ കണ്ടെത്തുന്ന അഖിലേന്ത്യ അന്തർ സർവകലാശാല ഫുട്ബോൾ ഫൈനൽ മത്സരത്തിൽ എതിരില്ലാതെ 2 ഗോളിന് കാലിക്കറ്റ്‌ യൂണിവേഴ്സിറ്റി ജലന്ദർ സന്റ് ബാബ ഭഗ് സിംഗ് യൂണിവേഴ്സിറ്റിയെ തോൽപിച്ചു. 11 ആം തവണയാണ് കാലിക്കറ്റ്‌ അഖിലേന്ത്യ ചാമ്പ്യൻമാരാകുന്നത്. ഏറ്റവും ഒടുവിൽ 2018ലാണ് കാലിക്കറ്റ് ജയിക്കുന്നത്. ഏറ്റവും കൂടുതൽ തവണ അഖിലേന്ത്യ ചാമ്പ്യൻമാരാകുന്ന യൂണിവേഴ്സിറ്റി കൂടിയാണ് കാലിക്കറ്റ്‌. സതീവൻ ബാലൻ എന്ന പരിശീലകന്റെ നേതൃത്വത്തിൽ 4 തവണയാണ് കാലിക്കറ്റ്‌ ജേതാക്കളകുന്നത്. 2018ൽ കേരളം സന്തോഷ്‌ ട്രോഫി ജേതാക്കൾ ആകുമ്പോൾ സതീവൻ ബാലൻ ആയിരുന്നു കോച്ച്. 10 വർഷം ഇന്ത്യൻ ജൂനിയർ ടീമിന്റെ പരിശീലകൻ കൂടിയാണ് സതീവൻ.

കാലിക്കറ്റിനു വേണ്ടി 18 ആം മിനിറ്റിൽ നിസാമുദീൻ യു. കെ (17)യും,22 ആം മിനിറ്റിൽ മുഹമ്മദ്‌ ഷഫ്‌നീദും(7)ഓരോ ഗോൾ അടിച്ചു.അഖിലേന്ത്യ അന്തർ സർവ്വകലാശാല ഫുട്ബോൾ ചാംപ്യന്മാരെ കണ്ടെത്താനുള്ള അവസാന മത്സരത്തിൽ കേരളത്തിൻ്റെ മുഴുവൻ പ്രതീക്ഷയുമായാണ് കാലിക്കറ്റ് യൂണിവേഴ്സിറ്റി ടീം മാർ അത്തനേഷ്യസ് സ്റ്റേഡിയത്തിൽ കളിക്കാനിറങ്ങിയത്.

രാവിലെ നടന്ന സെമി ഫൈനൽ മത്സരത്തിൽ എം. ജി യൂണിവേഴ്സിറ്റി യെ എതിരില്ലാതെ 1 ഗോളിന് തോൽപിച്ചാണ് കാലിക്കറ്റ്‌ ഫൈനലിൽ പ്രവേശിച്ചത്. പഞ്ചാബി യൂണിവേഴ്സിറ്റി യെ എതിരില്ലാതെ ഒരു ഗോളിന് തോൽപ്പിച്ചാണ് സന്റ് ബാബ ഭഗ് സിംഗ് യൂണിവേഴ്സിറ്റി ഫൈനലിൽ എത്തിയത്.അഖിലേന്ത്യ അന്തർ സർവകലാശാല ഫുട്ബോൾ മത്സരത്തിൽ എം. ജി. സർവകലാശാല ഉൾപ്പെടെ രാജ്യത്തെ 16 യൂണിവേഴ്സിറ്റി ടീമുകൾ ആണ് മത്സരത്തിനുണ്ടായത്. ഇതിൽ ദക്ഷിണ മേഖല ചാമ്പ്യൻമാരായിരുന്നു എം. ജി.

ബെസ്റ്റ് സ്ട്രൈക്കർ : മിഷാൾ പി. കെ. (കാലിക്കറ്റ്‌ )
ബെസ്റ്റ് മിഡ്‌ ഫീൽഡർ : നിതിൻ വിത്സൺ (എം. ജി )
ബെസ്റ്റ് ഡിഫെൻഡർ : അജയ് അലക്സ്‌ (എം. ജി )
ബെസ്റ്റ് ഗോൾ കീപ്പർ : സുഹൈൽ പി. കെ (കാലിക്കറ്റ്‌ )

കോതമംഗലം: എം.എ.കോളേജില്‍ അന്തര്‍സര്‍വ്വകലാശാല ഫുട്‌ബോള്‍ ചാംപ്യൻഷിപ്പ് അവസാന ദിനത്തിലേക്ക് അടുത്തപ്പോള്‍ സംഘാടനത്തിൽ പിഴവ് ആരോപിച്ച് അനാവശ്യ വിവാദമുണ്ടാക്കാന്‍ കേരള, കാലിക്കറ്റ് ടീമുകൾ നടത്തിയ ശ്രമത്തിന് വൻ തിരിച്ചടിയായി പരിശോധനാ ഫലം പുറത്തുവന്നു. അതോടെ കേരള, കാലിക്കറ്റ് ടീമുകൾ അനാവശ്യ വിവാദം ഉയർത്താൻ ആസൂത്രിത നീക്കം നടത്തുകയായിരുന്നു എന്ന വിമര്‍ശനം ശക്തമാകുന്നു. എന്നാൽ കളിയിലും സംഘാടനത്തിലും എല്ലാവരുടേയു പ്രശംസപിടിച്ചു പറ്റിയപ്പോള്‍ ചിലര്‍ അനാവശ്യവിവാദം ഉണ്ടാക്കി മേളയുടെ പകിട്ടു കുറക്കരുതെന്ന് സംഘാടകര്‍ ആവശ്യപ്പെട്ടു.

എം.ജി.ടീമിനും കേരളത്തിനു പുറത്തുള്ള മറ്റൊരു ടീമിനും ഇത്തരത്തില്‍ ഭക്ഷണം സംബന്ധിച്ച് പരാതി ഉണ്ടായിരുന്നില്ല. ഭക്ഷണവും വെള്ളവും ഗുണനിലാവാരമില്ലാത്തതാണെന്ന് ചൂണ്ടിക്കാട്ടി ഇവര്‍ ഭക്ഷ്യവകുപ്പിനും ജല അതോറിട്ടി അധികൃതര്‍ക്കും പരാതി നൽകി. ഇതേ തുടർന്ന് ബന്ധപ്പെട്ട ഉദ്യോഗസ്ഥർ സ്ഥലത്തെത്തി പരിശോധന നടത്തി, സാമ്പിള്‍ ശേഖരിച്ച് പരിശോധിച്ചതില്‍ യാതൊന്നും വിഷമയമായി കണ്ടെത്തിയില്ല. കഴിഞ്ഞ രണ്ടാഴ്ചയോളമായി 99 സര്‍വകലാശാലകളില്‍നിന്ന് കളിക്കാരും അവരുടെ മറ്റ് ടീം അംഗങ്ങളുമായി ആറായിരത്തോളം പേര്‍ പ്രത്യേകം തയ്യാറാക്കിയ ഭക്ഷണവും വെള്ളവുമാണ് ഉപയോഗിച്ചിരുന്നത്. തന്നെയുമല്ല ആരോഗ്യവകുപ്പ് അധികൃതര്‍ ഉള്‍പ്പെടെ പ്രത്യേക ക്ഷണിതാക്കളായി എത്തിയവരും ക്യാംപസിൽ തയ്യാറാക്കിയ ഭക്ഷണം കഴിച്ചതാണ്. അവർക്കാർക്കും തന്നെ യാതൊരു പ്രശ്നവും ഉണ്ടായില്ല.

കോതമംഗലം : കോതമംഗലം മാർ അത്തനേഷ്യസ് കോളേജിൽ നടക്കുന്ന അഖിലേന്ത്യ അന്തർ സർവ്വകലാശാല ഫുട്ബോൾ ചാംപ്യൻഷിപ്പ് -ക്വാർട്ടർഫൈനൽ മത്സരത്തിൽ ഗ്രൗണ്ട് 1ൽ
രാവിലെ 7 മണിക്ക് നടന്ന മത്സരത്തിൽ എതിരില്ലാത്ത 3 ഗോളുകൾക്ക് എം.ജി യൂണിവേഴ്സിറ്റി യുടെ ചുണക്കുട്ടികൾ ,അക്രമണകാരികളായ ബംഗാളിന്റെ പുലികുട്ടികൾ കളിക്കുന്ന കൽക്കട്ട യൂണിവേഴ്സിറ്റിയെ പരാജയപ്പെടുത്തി സെമി ഫൈനലിൽ കടന്നു. ഗിഫ്റ്റി സി ഗ്രേഷ്യസ് ( 6 ) ,നിമ്ഷാദ് റോഷൻ (21 ), എം.എ കോളേജിലെ സലാഹുദീൻ അദിനാൻ കെ. ( 14) എന്നിവർ എം.ജിക്കു വേണ്ടി ഗോൾ നേടി.

9 മണിക്ക് പഞ്ചാബ് യൂണിവേഴ്സിറ്റിയും കാലിക്കറ്റ്‌ യൂണിവേഴ്സിറ്റിയും തമ്മിൽ നടന്ന മത്സരത്തിൽ എതിരില്ലാത്ത 2 ഗോളുകൾക്ക് കാലിക്കറ്റ് ജയിച്ചു.കാലിക്കറ്റിനുവേണ്ടി മിഷൽ പി. കെ (10) ,നിഷാമുദ്ദീൻ യു.കെ (17) എന്നിവർ ഗോളുകൾ നേടി. ഗ്രൗണ്ട് 2ൽ രാവിലെ 7 ന് പഞ്ചാബി യൂണിവേഴ്സിറ്റിയും അടമസ്‌ യൂണിവേഴ്സിറ്റിയും തമ്മിലുള്ള മത്സരത്തിൽ എതിരില്ലാത്ത ഒരു ഗോളിന് പഞ്ചാബി യൂണിവേഴ്സിറ്റി അടമസ്‌ യൂണിവേഴ്സിറ്റിയെ പരാജയപ്പെടുത്തി. 9 മണിക്ക് കേരള യൂണിവേഴ്സിറ്റിയും സന്റ് ബാബ ഭഗ് സിംഗ് യൂണിവേഴ്സിറ്റിയും തമ്മിൽ നടന്ന മത്സരത്തിൽ 1 ന് എതിരെ 2 ഗോളുകൾക്ക് സന്റ് ബാബ ഭഗ് സിംഗ് യൂണിവേഴ്സിറ്റി കേരളയെ പരാജയപ്പെടുത്തി.

കോതമംഗലം മാർ അത്തനേഷ്യസ് കോളേജിൽ നടക്കുന്ന അഖിലേന്ത്യ അന്തർ സർവകലാശാല ഫുട്ബോൾ മത്സരത്തിന്റെ സെമി ഫൈനൽ മത്സരത്തിൽ ഞായറാഴ്ച രാവിലെ 7 മണിക്ക് ഗ്രൗണ്ട് 1ൽ എം. ജി യൂണിവേഴ്സിറ്റി യും കാലിക്കറ്റ്‌ യൂണിവേഴ്സിറ്റിയും തമ്മിൽ ഏറ്റു മുട്ടും. ഗ്രൗണ്ട് 2ൽ രാവിലെ 7 മണിക്ക് പഞ്ചാബി യൂണിവേഴ്സിറ്റി പട്യലയും സൻറ് ബാബ ഭഗ് സിംഗ് യൂണിവേഴ്സിറ്റി ജലന്ദറും തമ്മിൽ മത്സരിക്കും.