കോതമംഗലം:- രണ്ടരക്കിലോ കഞ്ചാവുമായി യുവാവ് കോതമംഗലത്ത് പിടിയിൽ. ഇന്ന് ശനിയാഴ്ച്ച രാത്രിയാണ് പ്രതി എക്സൈസിൻ്റെ പിടിയിലായത്. കുട്ടമംഗലം, തേൻകോട് സ്വദേശി റിൻസ് (25) ആണ് രണ്ടരക്കിലോ കഞ്ചാവുമായി പിടിയിലായത്. തങ്കളത്ത് വച്ച് കൈയിൽ ബിഗ് ഷോപ്പറുമായി കണ്ട പ്രതിയെ സംശയം തോന്നിയ എക്സൈസ് ചോദ്യം ചെയ്യുകയായിരുന്നു. മുമ്പ് കഞ്ചാവ് കേസുമായി ബന്ധപ്പെട്ട് പ്രതിയെ ഓഫീസിൽ വിളിച്ചു വരുത്തിയിട്ടുള്ളതിനാൽ എക്സൈസിന് പ്രതിയെ മുഖ പരിചയം തോന്നിയതാണ് വഴിത്തിരിവായത്.തുടർന്ന് ബിഗ് ഷോപ്പറിനുള്ളിൽ നിന്ന് രണ്ടര കിലോ കഞ്ചാവ് കണ്ടെടുക്കുകയായിരുന്നു.

പെരുമ്പാവൂരിൽ നിന്നാണ് പ്രതി കഞ്ചാവ് കൊണ്ടുവന്നത് എന്ന് എക്സൈസ് സർക്കിൾ ഇൻസ്പെക്ടർ ജോസ് പ്രതാപ് പറഞ്ഞു. പ്രിവൻ്റീവ് ഓഫീസർ നിയാസ്, സിദ്ധിഖ്, ജിമ്മി, അനൂപ്, എൽദോ, ഉമ്മർ, വിജു പോൾ എന്നിവരും അന്വേഷണ സംഘത്തിലുണ്ടായിരുന്നു.

പെരുമ്പാവൂർ : ഇരുചക്ര വാഹന മോഷ്ടാക്കൾ അറസ്റ്റിൽ. അറയ്ക്കപ്പടി മേപ്പുറത്തുപടി പുതുപ്പാറക്കാവ് ഭാഗത്ത് ചിറ്റേത്ത്പറമ്പിൽ വീട്ടിൽ വിഷ്ണു (22), കുട്ടമ്പുഴ മാമലക്കണ്ടം ഭാഗത്ത് മറ്റത്തിൽ വീട്ടിൽ നിന്നും ഇപ്പോൾ വളയൻചിറങ്ങര റബർ പാർക്ക് ഭാഗത്ത് താമസം അഭിജിത്ത് (22) എന്നിവരെയാണ് പെരുമ്പാവൂർ പോലീസ് അറസ്റ്റ് ചെയ്തത്. രണ്ടാഴ്ച മുൻപ് അറയ്ക്കപ്പടി ജംഗ്ഷനു സമീപമുള്ള ഷോറൂമിന്‍റെ മുൻവശത്ത് പാർക്ക് ചെയ്തിരുന്ന മോട്ടോർ സൈക്കിളാണ് ഇവർ മോഷ്ടിച്ചത്. പുത്തൻകുരിശ് പോലീസ് സ്റ്റേഷനിൽ രജിസ്റ്റർ ചെയ്ത രണ്ട് മോഷണ കേസുകളിലെ പ്രതിയാണ് വിഷ്ണു. ഇൻസ്പെക്ടർ ആർ.രഞ്ജിത്ത്, എസ്.ഐമാരായ റിൻസ്.എം.തോമസ്. ജോസി.എം.ജോൺസൻ, ബർട്ടിൻ, എ.എസ്.ഐ ജോഷി, സി.പി.ഒ ബാബു കുര്യാക്കോസ് എന്നിവരാണ് അന്വേഷണ സംഘത്തിലുണ്ടായിരുന്നത്.

മുവാറ്റുപുഴ : ലോഡ്ജിൽ മോഷണം നടത്തിയ പ്രതി അറസ്റ്റില്‍. കോഴിക്കോട് കൊയിലാണ്ടി നെച്ചാട് മണ്ണാറത്തുവീട്ടില്‍ ജംഷീദ് (33) നെയാണ് വാഴക്കുളം പോലീസ് അറസ്റ്റ് ചെയ്തത്. ഇയാള്‍ രണ്ട് മാസം മുന്‍പ് വാഴക്കുളം എം.സി ലോഡ്ജിലെ മുറിയില്‍ നിന്നും എൺപത്തി അയ്യായിരം രൂപയും മുന്‍വശം പാര്‍ക്ക് ചെയ്തിരുന്ന പിക്കപ്പ് ട്രക്കും മോഷ്ടിച്ചുകൊണ്ടുപോവുകയായിരുന്നു. മോഷണത്തിന് ശേഷം ഒളിവില്‍ പോയ ഇയാളെ പ്രത്യേക സംഘം രൂപീകരിച്ച് നടത്തിയ അന്വേഷണത്തില്‍ കൊഴിക്കോട് പേരാമ്പ്രയില്‍ നിന്നുമാണ് പിടികൂടിയത്. അന്വേഷണ സംഘത്തില്‍ ഇന്‍സ്പെക്ടര്‍ എസ്.സതീഷ്കുമാര്‍, സബ് ഇന്‍സ്പെക്ടര്‍ എം.എ.ഷക്കീര്‍,എ.എസ്.ഐ എന്‍.എന്‍.സജീവന്‍, സീനിയര്‍ സിവില്‍ പോലീസ് ഓഫീസര്‍മാരായ റെജി,വര്‍ഗ്ഗീസ്.റ്റി.വേണാട്ട് എന്നിവരാണ് ഉണ്ടായിരുന്നത്.