കോതമംഗലം: കോതമംഗലം ബ്ലോക്കിലെ പ്രധാൻമന്ത്രി സമ്മാൻ നിധി പദ്ധതി പ്രകാരം അനുകൂല്യം ലഭിക്കുന്ന മുഴുവൻ കർഷകരും തുടർന്നും ആനുകൂല്യം ലഭിക്കുന്നതിനായി ആധാർ കാർഡ്, കരം തീർത്ത രസീത്, ഒ.റ്റി പി. ലഭ്യമാകുന്ന ഫോൺ എന്നിവ സഹിതം അക്ഷയ കേന്ദ്രങ്ങൾ / കംപൂട്ടർ സെൻ്ററുകൾ, ഓൺലൈൻ സർവിസ് കേന്ദ്രങ്ങൾ വഴിയോ, കൃഷി വകുപ്പിന്റെ AIMS എന്ന പോർട്ടലിൽ നേരിട്ട് ലോഗിൻ ചെയ്തോ പി.എം കിസ്സാൻ പദ്ധതിയുടെ ഭാഗമായുള്ള കൃഷി ഭൂമിയുടെ വെരിഫിക്കേഷൻ നിർബന്ധമായും സമർപ്പിക്കേണ്ടതാണ്. സ്വന്തം പേരിലുള്ള സ്ഥലത്തിന്റെ വിവരങ്ങൾ രേഖപ്പെടുത്തിയാണ് കൊടുക്കേണ്ടത്. അപേക്ഷകന്റെ പേരും കരം അടച്ച രസീതിലെ പേരും ഒന്ന് തന്നെ ആണെന്ന് ഉറപ്പു വരുത്തി മെയ്‌ 31 നകം കൃഷിഭൂമിയുടെ വിവരങ്ങൾ പൂർത്തീകരിക്കണമെന്ന് കൃഷി അസിസ്റ്റൻ്റ് ഡയറക്ടർ വി.പി സിന്ധു അറിയിച്ചു.

പിണ്ടിമന: കാർഷിക വികസന കർഷക ക്ഷേമ വകുപ്പിൻ്റെ ഞങ്ങളും കൃഷിയിലേക്ക് പദ്ധതി പ്രകാരം പിണ്ടിമന പഞ്ചായത്തിലെ പതിമൂന്നാം വാർഡിൽ എം.വി.പൗലോസ് മണലിക്കുടി എന്ന കർഷകൻ്റെ ജൈവ പാവൽ കൃഷിയുടെ വിളവെടുപ്പ് നടത്തി.വി.എഫ്.പി.സി.കെ യിൽ നിന്നും വാങ്ങിയ പ്രിയ ഇനത്തിൽപ്പെട്ട പാവൽ വിത്താണ് തൻ്റെ സ്വന്തം കൃഷിയിടത്തിൽ പരീക്ഷിച്ച് വിജയം കണ്ടിരിക്കുന്നത്. ഏത്തവാഴ, പച്ചക്കറി, ഇഞ്ചി, മഞ്ഞൾ, പൈനാപ്പിൾ തുടങ്ങീ കൃഷികൾ പാട്ടത്തിനെടുത്ത് കൃഷി ചെയ്യുന്ന മാതൃകാ കർഷകനാണ് പൗലോസ് മണലിക്കുടി. ജൈവ രീതിയിലുള്ള കൃഷിയായതിനാൽ വിറ്റഴിക്കാൻ ബുദ്ധിമുട്ടില്ലെന്ന് കർഷകൻ സാക്ഷ്യപ്പെടുത്തുന്നു.

കൃഷിയിടത്തിൽ വച്ച് നടത്തിയ പാവൽ കൃഷിയുടെ വിളവെടുപ്പ് പഞ്ചായത്ത് പ്രസിഡൻ്റ് ജെസ്സി.സാജു ഉത്ഘാടനം ചെയ്തു. സ്ഥിരം സമിതി അദ്ധ്യക്ഷൻമാരായ സിബി പോൾ, മേരി പീറ്റർ, ഗ്രാമ പഞ്ചായത്തംഗം റ്റി.കെ.കുമാരി,ജസ്റ്റിൻ തോട്ടുങ്കൽ എന്നിവർ പങ്കെടുത്തു. കൃഷി ഓഫീസർ ഇ.എം.അനീഫ സ്വാഗതവും കൃഷി അസിസ്റ്റൻ്റ് വി.കെ.ജിൻസ് നന്ദിയും പറഞ്ഞു.

കോതമംഗലം : കാർഷിക വികസന കർഷക ക്ഷേമ വകുപ്പിൻ്റെ “ഞങ്ങളും കൃഷിയിലേക്ക് ” എന്ന പദ്ധതി പ്രകാരം പിണ്ടിമന കൃഷിഭവൻ്റേയും ആയക്കാട് എൻ.എസ്.എസ് കരയോഗത്തിൻ്റേയും സംയുക്താഭിമുഖ്യത്തിൽ തൃക്കാരിയൂർ എൻ.എസ്.എസ് യു.പി സ്കൂളിൽ കരനെൽ കൃഷിയാരംഭിച്ചു. കാർഷിക സംസ്കാരം കുട്ടികളിലൂടെ പകർന്ന് നൽകി വരും തലമുറയെ കാർഷിക മേഖലയിലേക്ക് ആകർഷിക്കുന്ന ബൃഹത്തായ ലക്ഷ്യമാണ് പദ്ധതിയിലൂടെ നടപ്പാക്കുന്നത്. പഞ്ചായത്തിലെ മുഴുവൻ സ്കൂളുകളിലും കരനെൽക്ക് കൃഷിക്ക് പുറമെ വിവിധങ്ങളായ പച്ചക്കറികളും പഴവർഗ്ഗങ്ങളും കൃഷി ചെയ്യും. കൃഷിഭവനിൽ നിന്നും നൽകിയ ഉമ വിത്ത് ഉപയോഗിച്ചാണ് സ്കൂളിൻ്റെ പുറക് വശത്തെ അമ്പത് സെൻ്റ് സ്ഥലം കൃഷിയോഗ്യമാക്കിയത്.

കൃഷി വകുപ്പിൻ്റെ ജില്ലയിലെ മികച്ച പച്ചക്കറി കൃഷി ചെയ്യുന്ന സ്കുളുകൾക്കുള്ള പുരസ്കാരം ഇതിന് മുമ്പ് തൃക്കാരിയൂർ യു.പി സ്കൂളിന് ലഭിച്ചിട്ടുണ്ട്. എൻ.എസ്.എസ് കരയോഗം പ്രസിഡൻ്റ് സി.ആർ.ജയൻ്റ അദ്ധ്യക്ഷതയിൽ ചേർന്ന വിത്തിടൽ ചടങ്ങ് പഞ്ചായത്ത് പ്രസിഡൻ്റ് ജെസ്സി.സാജു ഉത്ഘാടനംചെയ്തു. വൈസ് പ്രസിഡൻ്റ് ജെയ്സൺ ദാനിയേലും എൻ.എസ്.എസ് യൂണിയൻ താലൂക്ക് പ്രസിഡൻ്റ് നരേന്ദ്രൻനായരും മുഖ്യ പ്രഭാഷണം നടത്തി. വാർഡ് മെമ്പർ റ്റി.കെ കുമാരി, സ്കൂൾ ഹെഡ്മിസ്സസ് ജമ ടീച്ചർ, പി.ബാലൻ, രാധാമോഹനൻ, സ്കൂൾ കുട്ടികൾ, കരയോഗം ഭാരവാഹികൾ, കർഷകർ എന്നിവർ പങ്കെടുത്തു.കൃഷി ഓഫീസർ ഇ.എം.അനീഫ സ്വാഗതവും കൃഷി അസിസ്റ്റൻ്റ് വി.കെ.ജിൻസ് നന്ദിയും പറഞ്ഞു.

ഫോട്ടോ: ഞങ്ങളും കൃഷിയിലേക്ക് പിണ്ടിമന കൃഷിഭവനും ആയക്കാട് എൻ.എസ്.എസ് കരയോഗവും സംയുക്തമായി തൃക്കാരിയൂർ എൻ.എസ്.എസ് യു.പി സ്കൂളിൽ ആരംഭിച്ച കരനെൽകൃഷിയുടെ വിത്തിടൽ പഞ്ചായത്ത് പ്രസിഡൻ്റ് ജെസ്സി .സാജു ഉത്ഘാടനം ചെയ്യുന്നു.