Connect with us

TOURIST PLACES

കേട്ടറിവ് കോതമംഗലത്തെ സഞ്ചാരികളെ എത്തിച്ചത് “കൊള്ളിമല” എന്ന അത്ഭുത ഭൂമിയിലേക്ക്.

Published

on

കോതമംഗലം: കേട്ടറിഞ്ഞ കൗതുകം കോതമംഗലത്തെ സഞ്ചാരികളെ എത്തിച്ചത് തമിഴ് നാട്ടിലെ കൊള്ളിമലയിൽ. കോതമംഗലത്തുനിന്നും 400 കിലോമീറ്റർ സഞ്ചരിച്ചു വേണം തമിഴ്നാട്ടിലെ നാമക്കൽ ജില്ലയിൽ സ്ഥിതി ചെയ്യുന്ന കൊല്ലിമലയിൽ എത്തുവാൻ. കോതമംഗലത്തു നിന്നും പാലക്കാട് വാളയാർ കടന്ന് സേലം ഹൈവേയിലൂടെ ( L&T ബൈപ്പാസ് ) കരൂർ, നാമയ്ക്കൽ കൂടി കൊള്ളിമലയിൽ എത്താം.

സാധാരണക്കാർക്ക് അത്യാവശ്യ ഭക്ഷണവും താമസ സൗകര്യവുമെല്ലാം ലഭിയ്ക്കുന്ന ഒരു സ്ഥലമാണ് കൊള്ളിമല. 70 ഹെയർ പിൻ വളവുകൾ കയറിയാൽ 1300 മീറ്റർ ഉയരത്തിൽ, കോടമഞ്ഞും തണുപ്പുമൊക്കെയായി കാലാവസ്ഥ മാറിമറിയുന്ന 280 ചതുരശ്ര കിലോമീറ്റർ വിസ്തീർണ്ണമുള്ള കൊള്ളിമല. കൊള്ളിമലയിലെ ആകർഷണ കേന്ദ്രങ്ങളിലൊന്നായ ആകായ ഗംഗ (ആകാശഗംഗ ) വെള്ളച്ചാട്ടമാണ്.

അർപ്പളേശ്വര എന്ന ക്ഷേത്രത്തിനോട് ചേർന്നാണ് ഈ വെള്ളച്ചാട്ടം. ഈ ക്ഷേത്ര പരിസരത്തു നിന്നും ഏകദെശം ആയിരത്തോളം പടികൾ താഴോട്ടിറങ്ങിയാലാണ് വെള്ളച്ചാട്ടത്തിനടുത്തെത്താനാവുക. വൈകുന്നേരം മൂന്ന് മണിക്ക് ശേഷം വെള്ളച്ചാട്ടത്തിലേക്ക് പ്രവേശനം അനുവദിക്കില്ല. കുറഞ്ഞത് ഒന്നര മണിക്കൂറെങ്കിലും താഴെപ്പോയി വരാൻ എടുക്കുകയും ചെയ്യും. കേരളത്തിന്റെ ഗ്രാമീണ ഭൂപ്രകൃതിയാണ് കൊള്ളിമലയിൽ കാണാനാകുക. നെല്ലും നാണ്യവിളകളും പച്ചക്കറിയുമെല്ലാം അവിടെ കൃഷി ചെയ്യുന്നു.

എഴുപത് ഹെയർപിൻ ബെന്റുകളുടെ സൗന്ദര്യവും പ്രകൃതി ഭംഗിയും ആസ്വദിച്ച് തിരിച്ചു വരുമ്പോൾ അടിവാരത്തെ കാരവല്ലി എന്ന സ്ഥലത്ത് മിതമായ നിരക്കിൽ മാമ്പഴങ്ങൾ തോട്ടത്തിൽ നിന്നും നേരിട്ട് വാങ്ങുവാനും സാധിക്കും.

തമിഴ് നാട്ടിലെ മഴക്കാലത്താണ് ഇവിടേക്ക് യാത്രപോകുവാൻ ഏറ്റവും അനുയോജ്യമെന്ന് ഹെബ്രോൺ ട്രാവെൽസ് സാരഥികൂടിയായ എൽദോസ് വെളിപ്പെടുത്തുന്നു.  കൊള്ളിമലയിലെ ആകാശഗംഗ വെള്ളച്ചാട്ടം അപ്പോൾ കൂടുതൽ മനോഹരമാകുമെന്ന് എൽദോസ് പറയുന്നു.

70 ഹെർപ്പിൻ വളവുകളും കയറ്റവും, ആകാശ ഗംഗ വെള്ളച്ചാട്ടവും തിരിച്ചുള്ള ഇറക്കവും സഞ്ചാരികൾക്ക് മറക്കാനാവാത്ത അനുഭവമാണ് സമ്മാനിക്കുന്നതെന്ന് കോതമംഗലത്തുനിന്നും കൊള്ളിമലയിൽ പോയി വന്നവർ സാക്ഷ്യപ്പെടുത്തുന്നു.

Continue Reading
Click to comment

You must be logged in to post a comment Login

Leave a Reply

EDITORS CHOICE

മലമുകളിൽ നിന്നും നോക്കിയാൽ 20 കിലോമീറ്റർ അകലെയുള്ള ഇടമലയാർ ഡാം വ്യൂ

Published

on

  • അനന്ദു മുട്ടത്തു മാമലക്കണ്ടം

കുട്ടമ്പുഴ : കോതമംഗലത്തെ ഏറ്റവും വലിയ മലനിരകളിൽ ഒന്നായ പിണവൂർകുടി തേൻനോക്കി മലയിൽ നിന്നുള്ള ഇടമലയാർ ഡാം വ്യൂ സഞ്ചാരികളുടെ മനം കവരുന്നു. കോതമംഗലം താലൂക്കിലെ കുട്ടമ്പുഴ പഞ്ചായത്തിലെ പിണവൂർകുടി ആദിവാസി മേഖലയിലെ തേൻനോക്കിമല ഇഞ്ചത്തൊട്ടിക്കും പിണവൂർകുടിക്കും നടുക്കായാണ് സ്ഥിതി ചെയ്യുന്നത്. പിണവൂർകുടിയിൽ നിന്ന് ഏകദേശം അഞ്ചു കിലോമീറ്റർ വനത്തിലൂടെ ട്രക്കിങ് നടത്തിയാൽ മാത്രമേ തേൻ നോക്കിമലയിൽ എത്തുവാൻ സാധിക്കുകയുള്ളൂ. പിണവൂർകുടിയിൽ നിന്ന് തേൻ നോക്കി മലക്ക് പോകുന്നവഴി ആനത്താര ആയതിനാൽ ചിലപ്പോൾ ആനയെ കാണുവാൻ സാധിക്കും . അട്ടയുടെ ശല്യം കൂടുതലായി ഉള്ള പ്രദേശം കൂടിയായതുകൊണ്ട് ദേഹത്തു കയറുവാൻ സാധ്യത ഉണ്ട്.

മലയുടെ മുകളിൽ എത്തിയാൽ പിണവൂർകുടി, ഉരുളൻതണ്ണി, കുട്ടമ്പുഴ, ഏകദേശം 20 കിലോമീറ്റർ അകലെ ഉള്ള ഇടമലയാർ ഡാം എന്നിവ കാണുവാൻ സാധിക്കും. കൂടാതെ അവിടെ നിന്നും ഒരു കിലോമീറ്റർ കൂടി നടന്നാൽ എറണാകുളം ജില്ലയിലെ തന്നെ ഏറ്റവും വലിയ വെള്ളച്ചാട്ടം എന്ന് വിശേഷിപ്പിക്കാവുന്ന പാൽക്കുളം വെള്ളച്ചാട്ടത്തിനു അടുത്ത് എത്താം. ആരും അറിയാതിരുന്ന പാൽക്കുളം വെള്ളച്ചാട്ടം ജനശ്രദ്ധ ആകർഷിക്കാൻ തുടങ്ങിയിട്ട് കുറച്ചു നാളുകളെ ആയിട്ടുള്ളൂ. കോതമംഗലത്തിന്റെ ഒളിഞ്ഞിരിക്കുന്ന മനോഹര ദൃശ്യ ഭംഗി ആസ്വദിക്കുവാനായി പിണവൂർകുടിയിൽ നിന്നും ലോക്കൽ ഗൈഡ് കിട്ടും. വനം വകുപ്പിന്റെ അനുമതി കൂടി മാത്രമേ തേൻ നോക്കി മലയിലേക്ക് പോകുവാൻ സാധിക്കുകയുള്ളൂ. കൂടുതൽ വിവരങ്ങൾക്ക് 9072497942, 8137020401 എന്നീ നമ്പറുകളിൽ ബന്ധപ്പെടുക.

Continue Reading

EDITORS CHOICE

പ്രകൃതി കാഴ്ചയുടെ വിരുന്നൊരുക്കി കുട്ടമ്പുഴയിലെ തേൻനോക്കി മലയും, പാൽക്കുളം വെള്ളച്ചാട്ടവും

Published

on

  • അനന്ദു മുട്ടത്തു മാമലക്കണ്ടം

കോതമംഗലം : പ്രകൃതി അതിന്റ മായികഭാവങ്ങൾ ആവോളം വാരി വിതറിയ തേൻനോക്കി മല കാഴ്ചയുടെ വിരുന്നൊരുക്കുന്നു. മനോഹരമായ മലയെ ഉൾപ്പെടുത്തി വിനോദ സഞ്ചാരികൾ ട്രക്കിങ് ആരംഭിച്ചു കഴിഞ്ഞിരിക്കുന്നു. നേര്യമംഗലം ഫോറെസ്റ്റ് റേഞ്ചിൽ ഉൾപ്പെട്ട പിണവൂർകുടിയിൽ ആണ് തെൻനോക്കി മല സ്ഥിതിചെയ്യുന്നത്. കാടിന്റെ ഭംഗി ആസ്വദിക്കാൻ എത്തിയ പ്രദേശവാസികൾ ആണ് ഈ വിസ്മയ കാഴ്ചകൾ പുറംലോകത്ത് എത്തിച്ചത്. കണ്ണെത്താത്ത വിശാലതയിൽ ആകാശം മുട്ടിനിൽക്കുന്ന തേൻ നോക്കിമല കാടിന്റെ ഭംഗിയും, ട്രക്കിങ്ങും, സാഹസികതയും ഇഷ്ടപ്പെടുന്നവരുടെ പറുദീസ ആയി കഴിഞ്ഞിരിക്കുന്നു.നാലുവശവും വനത്താൽ ചുറ്റപ്പെട്ടു കിടക്കുന്ന ആദിവാസി മേഖലയാണ് പിണവൂർകുടി. കോതമംഗലത്തു നിന്നും തട്ടേക്കാട് , കുട്ടമ്പുഴ, ഉരുളന്തണ്ണി, പിന്നെ പിണവൂർകുടിയിൽ നിന്നും 5 കിലോമീറ്ററോളം കൊടും വനത്തിലൂടെ സഞ്ചരിച്ചാൽ ഇവിടെ എത്തപ്പെടാം. ഇവിടേക്ക് എത്തുക എന്നത് അത്ര എളുപ്പം അല്ല.

ആനയുടെ സാന്ദ്രത ഏറ്റവും കൂടുതൽ ഉള്ള വനമാണ്. ഇവിടെയുള്ള ആനകൾ ആക്രമണകാരികൾ ആണ് എന്നാണ് പ്രദേശവാസികൾ പറയുന്നത്. അതുകൊണ്ട് തന്നെ അതീവ ജാഗ്രതയോടും ശ്രദ്ധയോടും കൂടിയേ ഇവിടേക്ക് പോകുവാൻ സാധിക്കു. കൂടാതെ അട്ടകളും കൂടുതലായി ഉണ്ട് 100ൽ പരം അട്ടകൾ ദേഹത്തു കയറുന്നതാണ്. മലയുടെ മുകളിൽ എത്തിയാൽ ആകാശ നെറുകിൽ എത്തിയ ഫീൽ ആണ് ലഭിക്കുന്നത്. പിണവൂർകുടിയും, ഉരുളന്തണ്ണിയും, കുട്ടംപുഴയും, തട്ടേക്കാടും, അങ്ങ് ദൂരെ കിലോമീറ്ററുകൾ അകലെ ഉള്ള ഇടമലയാർ ഡാമും ഒറ്റനോട്ടത്തിൽ കാണാവുന്നതാണ്. കാടിന്റെ വിഭവങ്ങൾ ആയ നെല്ലിക്കയും, കാട്ടു ഇഞ്ചിയും പോകുന്ന വഴികളിൽ ധാരാളം ഉണ്ട്. മുന്നോട്ടുള്ള വഴികളിൽ ഒരു സൈഡിൽ അപ്പുറത്തെ മലയിൽ നിന്നും താഴേക്കു പതിക്കുന്ന പാൽക്കുളം വെള്ളച്ചാട്ടം ദൃശ്യമാണ്. എറണാകുളം ജില്ലയിൽ ഇത്രയും ഉയരം ഉള്ള വെള്ളച്ചാട്ടം വേറെ ഉണ്ടാകില്ല എന്ന് പറയേണ്ടി വരും.

വെള്ളച്ചാട്ടത്തിന് അടിയിൽ എത്തിച്ചേർന്നാൽ എയർ കണ്ടീഷനിൽ പോലും ലഭിക്കാത്ത അത്ര തണുപ്പും,സുഖവും ആണ് പ്രകൃതി ഇവിടെ കരുതി വെച്ചിരിക്കുന്നത്. വെള്ളച്ചാട്ടത്തിനു അടിയിൽ നിന്ന് കുളിക്കുവാൻ കഴിയും ആ ഒരു അനുഭവം ഒരു ഷവറിന്റെ അടിയിൽ നിന്നാലും കിട്ടില്ല. പെരിയാറിലേക്ക് ഒഴുകി എത്തുന്ന ഈ തോടിന്റ ഉത്ഭവസ്ഥാനത്ത് തന്നെയാണ് ഈ വെള്ളച്ചാട്ടം. പ്രദേശ വാസികളുടെ സഹായം ഇല്ലാതെ ഇവിടേക്ക് എത്തപ്പെടുവാൻ കഴിയുന്നതല്ല. രാവിലെ ട്രക്കിങ് ആരംഭിച്ചാൽ വൈകുന്നേരം 5 മണി ആകും തിരിച്ചു പിണവൂർകുടിയിൽ എത്തുമ്പോൾ. ആദിവാസി മേഖല ആയതിനാൽ ഈ വനമേഖലകൾ മാലിന്യ മുക്തമായാണ് സംരക്ഷിച്ചു പോരുന്നത്. അത് ഇവിടേക്ക് എത്തുന്ന സഞ്ചാരികളെയും കാത്തു സൂക്ഷിക്കണമെന്ന് പ്രദേശവാസികൾക്കും നിർബന്ധമാണ്.

Continue Reading

EDITORS CHOICE

സഞ്ചാരികളുടെ മനം കവർന്ന് മൂട്ടിപ്പഴം ; റംബുട്ടാനെ വെല്ലുന്ന പഴം നാട്ടിൽ സുലഭം.

Published

on

കോതമംഗലം : കൊച്ചി ധനുഷ്‌കോടി ദേശീയപാതയിൽ ഹൈറേഞ്ചിന്റെ കവാടമായ നേര്യമംഗലം പാലം കടന്ന് ചെല്ലുമ്പോൾ നമ്മെ വരവേൽക്കുന്നത് നയനാനന്ദകരമായ കാഴ്ച്ചകളും രുചിയുടെ വൈവിധ്യങ്ങളുമാണ്. കാട്ടുരുചിയുടെ വൈവിധ്യവും കാഴ്ചയുടെ സൗന്ദര്യവും കൊണ്ട് സഞ്ചാരികളുടെ ഇഷ്ട ഫലമായി മാറിയിരിക്കുകയാണ് മൂട്ടിപ്പഴം. മൂത്തുപഴുത്ത കായ്‌കളുടെ രക്ത വർണഭംഗിയിൽ ആകൃഷ്ടരായി അതിന്റെ ആരാധകരായി മാറിയിരിക്കുകയാണ് മൂന്നാർ പോകുന്ന വിനോദയാത്രക്കാർ. ചീയപ്പാറ വെള്ളച്ചാട്ടത്തിനും വാളറ കുത്തിനും സമീപത്തായി പ്രകൃതിയുടെ തനത് വിഭവമായ മൂട്ടിപ്പഴം വിൽക്കുന്ന പ്രദേശവാസികളെ കാണുവാൻ സാധിക്കും. റംബുട്ടാൻ പഴത്തോട് സാമ്യം തോന്നി വാങ്ങുവാനായി സഞ്ചാരികൾ അടുത്ത് വരുമ്പോളാണ് ഇത് അത്ഭുതങ്ങൾ ഒളിപ്പിച്ചുവച്ചിരിക്കുന്ന വന വിഭവം ആണെന്ന് മനസ്സിലാകുന്നത്.

കാട്ടിൽ നിന്നും ആദിവാസികളും മറ്റും ശേഖരിച്ചു നൽകുന്നതും , സ്വന്തം പറമ്പിൽ വിളയുന്നതുമായ പഴമാണ് ഇവർ വിൽപ്പനക്ക് എത്തിക്കുന്നത്. ഉപജീവന മാർഗ്ഗത്തിനായി മൂട്ടിപ്പഴ വിൽപ്പന നടത്തുന്നവർ പഴത്തെ പരിചയപ്പെടുത്തുകയും ആവശ്യാനുസരണം പഴം രുചിച്ചുനോക്കുവാനായി നൽകുകയും ചെയ്യുന്നത് അവരുടെ മനസ്സിന്റെ നന്മകൊണ്ടുമാത്രമാണ്. കിലോക്ക് നൂറ് രൂപ നിരക്കിലാണ് വിപണനം നടത്തുന്നത്. ഉൾക്കാമ്പിന്റെ മധുരവും വൈറ്റമിനുകളുടെയും ധാതുക്കളുടെയും സമ്പന്നതയും കൊണ്ട് ആരും കൊതിക്കുന്ന കായ്കനിയാണ് മൂട്ടിപ്പഴം.

അൽപം പുളിചേർന്ന മധുരമാണ് ഇതിന്റെ സവിശേഷത. കരുവിനു കട്ടിയില്ലാത്തതിനാൽ ഉൾക്കാമ്പ് അനായാസം കഴിക്കാം. ശരീരത്തിലെ കൊഴുപ്പു കുറയ്‌ക്കുമെന്നതിനാൽ ദുർമേദസ് മാറ്റാൻ ഇതു കഴിക്കുന്നത് നല്ലതാണെന്ന് വിൽപ്പനക്കാരൻ പറയുന്നു. പുറംതോടിലും ഉൾക്കാമ്പിലുമുള്ള ആൻറി ഓക്‌സിഡന്റുകൾക്ക് കാൻസർ പോലുള്ള രോഗങ്ങൾ തടയാൻ കഴിവുണ്ടെന്നും , രക്തത്തിന്റെ കൗണ്ട് വർദ്ധിപ്പിക്കുവാൻ മൂട്ടിപ്പഴം  ചിലർ ഔഷധമായി ഉപയോഗിക്കാറുണ്ടെന്നും തട്ടേക്കാട് വനം വകുപ്പിലെ ഉദ്യോഗസ്ഥനായ ഷിബു ദാസ് വെളിപ്പെടുത്തുന്നു.

More Details Please Read this Article ; 

കൗതുകവും, കണ്ണിന് കുളിർമ്മയേകുന്ന കാഴ്ചയുമായി കുട്ടമ്പുഴ വന മേഖലയിലെ ‘മൂട്ടിപ്പഴം’

Continue Reading

Trending